A sa lyre
Naguiere chanter je voulois
Comme Francus au bord Gaulois
Avecq’ sa troupe vint descendre,
Mais mon luc pinçé de mon doi,
Ne vouloit en dépit de moi
Que chanter Amour, et Cassandre.
Je pensoi pource que toujours
J’avoi dit sur lui mes amours,
Que ses cordes par long usage
Chantoient d’amour, et qu’il faloit
En mettre d’autres, s’on vouloit
Luy aprendre un autre langage.
Et pour ce faire, il n’y eut fust,
Archet, ne corde, qui ne fust
Echangée en d’autres nouvelles :
Mais apres qu’il fut remonté,
Plus haut que davant a chanté
Comme il souloit, les damoyselles.
Or adieu doncq’ pauvre Francus,
Ta gloire, sous tes murs veinqus,
Se cachera toujours pressée,
Si, à ton neveu, nostre Roi,
Tu ne dis qu’en l’honneur de toi,
Il face ma Lyre crossée.
Les meslanges
